Sotziu Culturale


Salvamos Orolìo - Salvamos sos Nuraghes

"Salvàmos Orolìo - Salvàmos sos Nuraghes" est unu Sòtziu chi ponet fattu a cantu at munìdu su Cumitadu "Salvàmos Nuraghe Orolìo", chi, pro primu, at tentu s'idea de diffunder pro mesu de Internet (in su situ conchidortos.org e in ateros chi si sun azzuntos) una regorta de frimas pro ponner remèdiu a su perìgulu 'e nde rùer de su nuraghe nostru piùs bellu.
Su Sotziu, diat cherrer ponner punta pro fagher a mediu chi da 'e su Comune fintzas a su Guvernu nazionale (passande po Provintzia 'e Nuoro e Regione Sarda), paris cun sos omines e sas feminas de bona volontade, si lèen a coro sa sorte 'e su Nuraghe Orolìo e de sos ateros ismentigados e derruttos.
Su Sotziu s'impignat fintzas pro fagher a connoscher e dare importu, diffundere e diffendere, costoìre e dare lughe a tottu sos benes (archeologicos, istòricos, de sa natura) chi tenìmos in su sartu 'e 'idda; isperàmos e chircamos de lu fagher cun s'azudu de sas Iscòlas, siat pro imparare nois sas medas cosas chi ancora no ischìmos, siat pro chi sos pitzinnos de iscola potan dare de prùs importu mannu a sos benes eredàdos e connotos.
E, in finitìa, nos diat piagher chi su triballiu e s'impignu de su Sotziu potad serbìre fintzas a fagher benner a pare tottu sos silanesos "mannos e minores" pro difender, costoìre e fintzas pro nos godìre sa siènda manna chi amos appidu sa sorte de àer in donu.

Tiu Juanne Lilliu, su mastru mannu de sos archeologos sardos, at atzettadu de intrare a Sotziu onorariu.


Su Sotziu Culturale "Salvàmos Orolìo - Salvàmos sos Nuraghes"
pregat tottus sos amantiosos a bintrare in Sotziu, sa tariffa po s'annu 2010 est de 10 euros.
Sos documentos de su Sotziu s'agattan inoghe:
Regulas_Sotziu.pdf - Dimanda_Sotziu.pdf